Belohahkii lihkostuvvan bihttá sámi identitehta birra

Emil Kárlsen herve Norgga-Suoma opera, mii gaskkohagaid šaddá measta lossaláganin operašáŋŋera konvenšuvnnaid geažil.

Teaksta: Juho-Sire/Siri Broch Johansen, musihkka: Emil Kárlsen og Cecilia Damström
Oulu, Suopma – ođđajagimánnu 17. b. – guovvamánnu 28. b.

Sámi kultuvra lea hirbmat áigeguovdil dán áigge, maiddái hui vuorddekeahtes báikkiin.

Diimmá jagi loahpageahčen ovdanbuvttii Stockholm-opera «Jordens hjärta» vuosttaš davvisámegielat opera goassege. Oulus Davvi-Suomas loktejuvvo dássi vel badjelii. «Ovllá» nammasaš čájálmasas lea luohti dat buot deháleamos vokálaelemeanta olles operabihtás, álggus lohppii.

«Jordens hjärta» ovdanbuvttii sámi sivdnádusmuitalusa, «Ovllá» ges lea mihá lagabus duohta eallima ja govvida nuorra suopmelaš bártni gii rahčá iežas sámi identitehtain.

Boađusin lea čájálmas mii buoremuddui lihkostuvvá áigumušain ovdanbuktit albma sámi opera, sihke hámi ja sisdoalu dáfus.

Emil guovddážis

«Ovllá» čájeha nappo juoidá mii ii leat báljo dahkkojuvvon ovdal operalávddis.

Teakstačálli lea Juho-Sire/Siri Broch Johansen, gii easka ládje olahii sihke Hedda-nammadeami ja Ibsen-bálkkašumi teáhterbihtáin «Per Hansen – oskkáldas almmái».

Njunnošis lávddis Ovllá-rollas lea Emil Kárlsen, Omasvuonas Romssas eret, gii lea bálkkašuvvon dáiddár, neavttár ja lávlu gii lea šaddame dađistaga eambbo beakkánin sihke Davviriikkain ja olgomáilmmis. Emil Kárlsen dáidá leat oahpis olu norgalaččaide Jussi-rolla oktavuođas Disney+ TV-ráiddus «Koke bjørn» (Guovžža vuoššat).

Loga árvvoštallama NRK:s